هناك أزمة عامة في الوطن العربي وهي عدم توفر القطع الإلكترونية بصورة كافية خاصة أن المحلات الموجودة في معظم الدول توفر القطع اﻹلكترونية المتعلقة بصيانة الأجهزة الكهربية المشهورة فقط ولا تلبي جميع احتياجات هواة الإلكترونيات.
منذ حوالي شهرين احتجت أن اصنع دائرة بمكونات Surface Mount فانطلقت إلى أشهر شارع في مصر لشراء المكونات الإلكترونية (باب اللوق) وظللت أبحث عن المقاومات SMD نحو ساعتين دون جدوى، حتى وجدت محل واحد فقط يوفر بعض القيم مثل 1k – 10k – 100k ohm فقط ولا يوجد أي قيم اخرى بالإضافة إلى أن سعر المقاومة الواحدة 50 قرش (10 أضعاف سعر المقاومة التقليدية في مصر).
فقررت أن أذهب إلى العملاق،،،،، الصين 🙂
الاستيراد من الصين عملية سهلة وليست معقدة كما يعتقد الجميع، وأجمل شئ هو السعر فائق الانخفاض والذي غالباً يكون 25% إلى 10% من سعر السوق المحلي (هذا يعني انك ستوفر من 70% الى 90% من سعر السلعة).
على سبيل المثال لقد قمت بشراء ما يقارب 1600 مقاومة Surface Mount مقاس 0805 (هذا الرقم يحدد مقدار صغر حجم المقاومة وإذا اردت أن تعرف المزيد عن هذه المقاسات عليك بزيارة الرابط التالي) بسعر 40 جنية مصري “6 دولار تقريباً” والشحن مجاني، لو كنت اشتريت هذا العدد من مصر كان سيكلفني 800 جنية أي ما يوازي 112 دولار تقريباً (هذا يعني أنني وفرت 95% من سعر المنتج!!!!!!!!).
في هذا المقال سأشرح الخطوات التي يجب عليك اتباعها لشراء أي قطع إلكترونية أو اي منتج من الصين، مع العلم أنني اسكن في مصر لذلك هذا المقال سيكون لكل قاطني جمهورية مصر العربية (مع العلم أن جميع الخطوات تصلح لكل البلاد العربية بلا استثناء).
المتطلبات:
1- بطاقة دفع عبر الانترنت مثل Visa Internet or Master Card
2- عنوان ثابت للشحن
3- رقم هاتف (جوال أو هاتف أرضي) خاص بك
الحصول على بطاقة الدفع:
في مصر توفر جميع البنوك تقريباً أحد وسائل الدفع الإلكترونية سواء كانت فيزا أو ماستر كارد، أنصحك بأحد البنكين وهما “البنك اﻷهلي المصري” أو “بنك قطر الوطني QNB”
توفرمعظم البنوك في مصر والعالم بطاقات الدفع المسبق عبر الانترنت وأشهرها في مصر بطاقة “توماس كوك للشباب من بنك CIB” للشباب من سن 16 سنة وتتميز هذه البطاقة بأنها أسهل وسيلة دفع يمكن الحصول عليها في مصر(متاحة ايضاً للأجانب الساكنين بمصر)، برسوم 20 جنية مصري فقط “3 دولار تقريباً” وتدفع كل عامين ولا يوجد حاجة لعمل حساب بنكي أو تقديم أي أوراق خاصة (تحتاج فقط صورة من بطاقتك القومية أو جواز السفر لغير المصريين) ويمكنك شحن هذه البطاقة بأي مبلغ بالجنية المصري ويتم تحويله إلى الدولار تلقائياً دون تدخل منك –
المقال التالي يشرح كيفية الحصول على بطاقة انترنت من معظم البنوك
بعد الحصول على البطاقة يمكنك اﻵن الشراء من المتاجر الصينية المتوفرة عبر الإنترنت واليك أفضل متجرين في رأيي الشخصي:
Ali Express
Deal Extreme
كلا الموقعين يقدمان خدمات ممتازة ولقد جربت الشراء من كلاهما، ما يميز deal extreme هو أن جميع المنتجات تأتي بشحن مجاني دون أي رسوم إضافيه، بينما يوفر موقع ali express المنتجات بصورة أرخص (أغلب هذه المكونات تكون مع شحن مجاني وبعضها يكون برسوم شحن زهيدة جداً مثل 1 او 2 دولار).
شخصياً أفضل Ali express لان يقدم ضمان لاسترداد المال في حالة ضياع او فقدان المنتج ويوجد به نظام لقياس مدى رضاء العميل شامل استرداد المال اذا لم يعجبك المنتج كما أنه يحتوي على مجموعة ضخمة جداً من المنتجات في كل المجالات تقريباً (لا يمكن مقارنة حجم المنتجات الموجود به بموقع dx.com حيث يتفوق Ali express بفارق واضح).
أيضاً يتوفق Ali Express في زمن الشحن، عندما اشتريت المقاومات استغرق الامر اسبوعين حتى وصلت مصر، و 5 ايام حتى وصلت الى مركز البريد في رمسيس (اجمالي 20 يوم) وعندما جربت dx.com استغرق اﻷمر نحو 35 يوم تقريباً.
ابدأ الشراء
قم بالاشتراك في الموقع وسجل جميع بياناتك بصورة صحيحة خاصة الاسم وعنوان الشحن (لاحظ أنه عند استلام المنتجات سيطلب منك البطاقة الشخصية ويجب أن تكون البيانات المكتوبة عليها مطابقة للعنوان المطبوع على الطرد القادم من موقع Ali Express).
بعد الانتهاء من كتابة كافة البيانات يمكنك اﻵن شراء أي مكونات تريدها، فمثلا لنبحث عن المقاومات Surface mount والتي تكتب SMD Resistors في مربع البحث.
لاحظ انه يوجد مجموعة من المربعات في الشريط العلوي لاختيار طريقة ترتيب النتائج مثل السعر (الأقل ثم اﻷعلى) أو عدد الطلباتOrders من هذا المتجر (هذا التصنيف يوضح مدى شهرة و موثوقيه المتجر الذي يبيع هذه المكونات ويعتبر افضل طريقة لاختيار الشخص الذي تريد الشراء منه)، وهناك تصنيف عدد التقييم من الزبائن Rating
أنصحك أن تقوم بترتيب النتائج دائما عن طريق كمية ال orders او التقييم Rating وبذلك تصلح على أفضل التجار (غالباً ما يكونو هم من يقدمون المنتج بأفضل سعر أيضاً).
كما نرى في الصورة السابقة أحد المتاجر الذي يقدم الـ Surface mount Resistor لديه عرض رائع بقيمة 6 دولار مقابل 2000 مقاومة بقيم مختلفة، لاحظ أنه في الجزء الاخير من الصفحة نجد أن البائع يدخل ضمن
Buyer Protection
Full Refund if you don’t receive your order
Refund or Keep items not as described
هذا يعني انه في حالة عدم استلام البضاعة او انها مختلفة عن المعروض يمكنك استرداد المال الذي دفعته، أيضاً لاحظ الجانب الايمن من الشاشة حيث نجد
Sold By
China
99.9% Positive feedback
السطر اﻷول : اسم المتجر Ace Wong Store
السطر الثاني: البلد المنتجة China
السطر الثالث: عدد الزبائن الذين قامو بتقييم هذا المتجر 1170 شخص
السطر الرابع: مدى رضى الزبائن عن هذا المتجر والذي يبدو أنه مرضي للغاية ليحصل على 99.9% 🙂
ايضاً يوجد زر Visit Store لزيارة هذا المتجر وتصفح جميع المنتجات الذي يعرضها للبيع.
تتبع المنتج حتى يصل من الصين الى بلدك:
بعد البحث عن القطع اﻹلكترونية التي ترغب بها ومقارنة الاسعار قم بشراء القطع ويتم الدفع عبر ادخال رقم الفيزا او الماستر كارد حيث يتم خصم قيمة المال المطلوب مباشرة ويتم اعطائك كود خاص لتتبع هذه الشحنة. مثل الموجود في الصورة التالية:
كما نرى من الصورة أصبح لدينا رقم لتتبع الشحنة، بهذا الرقم يمكن معرفة مكان الطرد الذي يحتوي على ما طلبناة، ويمكن معرفة هذا المكان عبر الموقع التالي:
هذا مثال عندما أدخلت الرقم الخاص بي في الموقعين
اذا كنت في مصر يمكنك معرفة مكان الشحنة بالتفصيل عبر موقع البريد المصري
http://www.egyptpost.org/services.aspx?Services_id=4
حسب موقع البريد المصري الطرد موجود ب PARCELS TRAFFIC CENTRE RAMSIS هذا هو مركز البريد الرئيسي في مصر الموجود بميدان رمسيس
عند وصول الطرد إلى هذا المركز يمكنك الذهاب إلى هناك لدفع المصاريف الادارية والجمارك (الجمارك على القطع الإلكترونية من 5 إلى 10% من سعرها).
لقد دفعت 11 جنية مصاريف ادارية و 4 جنيهات جمارك وبذلك يكون اجمال التكلفة لل 1600 مقاومة 57 جنية مصري (ما يوازي 8 دولار أمريكي)، الصور التالية بها صور الطرد والمقاومات بعد أن استلمتها.
واﻵن يبدو أن لدي مخزون كافي من المقاومات 🙂 🙂
———————–
مراجع اضافية:
فيديو يشرح الشراء من المواقع الصينية
تجربة شراء المكونات الإلكترونية من الاردن
كام ملاحظة جانبيةللمصريين 🙂 :
الاستيراد يستغرق من اسبوعين الى 3 اسابيع على حسب المكان والمحافظة، وفي حالة ان حضرتك ساكن في مكان غير القاهرة لازم تروح لمركز البريد الرئيسي التابع لمحافظتك
استيراد المنتجات الاسلكية او اي جهاز يستخدم في تقنية الاتصالات (مثل الهواتف النقالة) او يحتوي على هوائي Antenna يحتاج الى ترخيص من هيئة تنظيم الاتصالات في مصر NTRA
مجربتش بصورة شخصية استخراج التصريحات دي لكن من كلام اصدقائي فهمت انهم 3 انواع – على حسب تقدير موظف الجمارك في مركز البريد
النوع اﻷول لو طالب، بتجيب ورقة من الجامعة تثبت انك طالب وانك محتاج الاجهزة والمعدات دي
النوع الثاني: لو جهاز اتصالات مشهور زي الموبيلات او كارت شبكة .. الخ – ساعتها بتقدم طلب لهيئة تنظيم الاتصالات NTRA وموظف الجمارك هيشرحلك بالتفصيل تجيبها منين
النوع الثالث: في حالة ان الجهاز للاتصالات الاسلكية (لكن مش موبيل) ساعتها دا بيحتاج تصريح من جهاز اﻷمن القومي ورخصة خاصة لاستخدام الجهاز زي رخصة الهواية الاسلكية.
على سبيل المثال لنفترض انك عايز تشتري منتجات من التصنيفات التالية:
– موبيل، تابلت، كارت وايرلس عادي = التصريح من هيئة الاتصالات مجاناً
– راديو لاسلكي، اجهزة بث لاسلكية، الهوائيات بعيدة المدى = التصريح من هيئة الاتصالات ثم يتم ارفاق نسخة الى اﻷمن القومي للحصول على التصريح النهائي
ممكن تراجع المقال دا هيفيدك ببعض المعلومات:
شرح تجربة شراء موبيل من الصين إلى مصر
http://www.traidnt.net/vb/traidnt2455674
لم اجرب بصورة شخصية شراء اي من المنتجات اللاسلكية لذلك فالملاحظات المكتوبة عنها هي من واقع ما اعرفه من بعض الاصدقاء، وقد تتغير هذه المعلومات او التصاريح من وقت ﻵخر، لذلك أرجو أن تسأل الجهات المختصة وموظف الجمارك في البريد المصري.
بعض الدول العربية يوجد بها تصاريح مماثلة مثل اﻷردن، سوريا، لبنان و بعضها لا يوجد به هذه التصاريح المعقدة مثل السعودية وتمر المكونات الالكترونية بصورة طبيعية، دائماً راجع المسؤولين في بلدك قبل شراء أي شئ “لاسلكي” من الخارج
———————————–
تحديث 3: خاص للاستيراد من الصين إلى مصر 🙂
ملاحظات على تجربة رقم 3 في الشراء من موقع Aliexpress بتاريخ 4-11-2014
الحمدلله النهاردة أستملت طرد جديد كنت اشتريته من الصين من موقع ALiexpress وكان فيه حوالي 1000 مكثف سيراميك Surface Mount وفي كام ملحوظة مهمة على الموضوع خاصة للناس إلى عايزة تشتري المكونات اﻹلكترونية من برا مصر.
أولاً: الطرد وصل مصر بعد حوالي 26 يوم من تاريخ الشراء (الشحن المجاني بيستغرق من 30 الى 60 يوم للوصول الى البلد)
ثانياً: اذا كنت ساكن في منطقة خارج القاهرة (او داخل القاهرة وبعيدة عن منطقة رمسيس) هيتم تحويل الطرد الخاص بيك ﻷقرب مركز بريد والكلام دا هيتم بعد اسبوع من تاريخ وصول الطرد لمركز البريد الرئيسي في رمسيس.
لما روحت مركز رمسيس الرئيسي فهمت ان اذا اتأخرت في استلام الطرد هيتم تحويله لاقرب مركز من عنوان البيت (ودا حصل فعلا) وفي غرامة مالية بتدفع عن كل يوم تأخير، فمثلا المرة الي اشتريت فيها مقاومات SMD روحت استلمت الطرد بسرعة ودفعت حوالي 25 جنية جمارك وصاريف قانونية .. اما المرة دي دفعت جمارك + غرامة تأخير استلام باجمالي 41 جنية (يعني دفعت 20 جنية تقريباً بسبب التأخير 4 ايام).
الناس الي تحب تشتري حاجة من برا مصر لازم تفضل تتابع مكان وصولها وتحاول بقدر الامكان تروح تستملها بسرعة.
اذا التأخير في استلام الطرود زاد عن 15 يوم مركز البريد هيعيد ارسال الطرد للمصدر الرئيسي (التاجر الصيني ).
ثالثاً (هاااام جداً): لما بتشتري اي شيء من الصين او دولة أجنبية بيتم اعطاءك رقم تتبع للطرد الخاص بيك، انا لاحظت ان في مشكلة في مواقع التتتبع الصينية واﻷجنبية، واﻷفضل دائماً انك تتبع الطرد الخاص بيك من موقع البريد المحلي (في حالتي هيكون موقع البريد المصري) ودا اللينك الخاص بالموقع للأخوة في مصر.
http://www.egyptpost.org/services.aspx?Services_id=4
ودا اللينك بتاع التاجر الي اشتريت منه المقاومات والمكثفات (المنتجات جودتها كويسة جداً ووصلت فعلاً زي ما المنتج موصوف على الموقع بالظبط).
المقاومات:
http://www.aliexpress.com/…/0805-SMD-Resist…/1303739009.html
المكثفات:
http://www.aliexpress.com/…/0805-SMD-Cerami…/1820363322.html
استيراد المنتجات الاسلكية او اي جهاز يستخدم في تقنية الاتصالات (مثل الهواتف النقالة) او يحتوي على هوائي Antenna يحتاج الى ترخيص من هيئة تنظيم الاتصالات في مصر ارجو شرح كيفية استخراج هذه التراخيص
مجربتش بصورة شخصية استخراج التصريحات دي لكن من كلام اصدقائي فهمت انهم 3 انواع – على حسب تقدير موظف الجمارك في مركز البريد
النوع اﻷول لو طالب، بتجيب ورقة من الجامعة تثبت انك طالب وانك محتاج الاجهزة والمعدات دي
النوع الثاني: لو جهاز اتصالات مشهور زي الموبيلات او كارت شبكة .. الخ – ساعتها بتقدم طلب لهيئة تنظيم الاتصالات NTRA وموظف الجمارك هيشرحلك بالتفصيل تجيبها منين
النوع الثالث: في حالة ان الجهاز للاتصالات الاسلكية (لكن مش موبيل) ساعتها دا بيحتاج تصريح من أمن الدولة ورخصة خاصة لاستخدام الجهاز زي رخصة الهواية الاسلكية.
ممكن تراجع المقال دا هيفيدك ببعض المعلومات:
http://www.traidnt.net/vb/traidnt2455674/
عندنا في الاردن الجمرك مصيبة .. خصوصا ان المخمن لا يعترف باسعار الصين و يضع سعر من عنده .. ضريبو المبيعات 16% و الجمرك قد يصل الى 30% يعني بتدفع نصف قيمة المبلغ المقدر.
و اذا كنت محظوظ و حجم الطرد صغير جدا فقد ينفذ الى صندوك بيردك مباشرة بدون رسوم
مازال اﻷمر أرخص من الشراء مباشرة من التاجر فحتى بعد دفع 50% من القيمة هذا أفضل من دفع 2000% من القيمة للتاجر 🙂
الافضل انه تروح لصندوق البريظ مباشرة .. مجرد انهم يرنوا عليك يحكولك ليك غرض تعال خدوا مهناها حتدفع كتيير.. المشكلة انه يقدر سعر ..يا ريت ادفع 50% على سعر الصين
السلام عليكم يا أخ، أنا مثلك من الأردن.
أتمنى لو تطرح علي تجاربك مع الجمارك (أنا سكان اربد). كون حاسسهم زي الهياكل العظمية قاعدين ما بعرفوا شيء غير الأوامر. أنا حابب أشتري قطع إلكترونية مثل هذه المقالة وماكينة لحام نوع هاكو المشهورة وبعض أمور أخرى مشابهة.
أنا لست من اﻷردن أخي الكريم وانما من مصر 🙂
ربنا يجزيك خير يا رب :]
لو سمحت هل التصاريح دي عشان تشتري ولا عشان تعرف تستخدمه بعد ما انت جبته خلاص ولا لازم يكون معاك تصريح اولا عشان يطلع من الجمارك
لما المنتجات بتوصل مصر بتتحجز في الجمارك او في البريد (على حسب تقدير هيئة البريد)
ولما بتروح هناك بيطلبو منك تصريح اما من NTRA فقط او من NTRA وأمن الدولة
على حسب تصنيف المنتج الي انت مشترية
مثلاً لو موبيل، تابلت، كارت وايرلس عادي = التصريح من هيئة الاتصالات فقط وبيتعمل مجاناً
راديو لاسلكي، اجهزة بث لاسلكية، الهوائيات بعيدة المدى = التصريح من هيئة الاتصالات وأمن الدولة (أحد الاصدقاء قالي ان طلب التصريح بيتكلف 1500 جنية)
في حالة عدم الحصول على التصريح مش هتاخد الحاجة وهتتحجز في الجمارك
الشحن بيقعد كام يوم
لم شحنت من Ali Express خد اسبوعين لما وصل مصر، و 5 ايام لحد لما وصل مركز البريد في رمسيس يعني 20 يوم اجمالي
لما جرب dx.com خد تقريبا 35 يوم
انا ساكن فى القاهره هو انا لازم اروح استلم من البريد فى رمسيس ولا ممكن يجى لحد عنوانى ؟؟؟؟ وكمان عندى سؤال لو انا هاحتاج مثلا ايسيهين او تلاته ولا لازم
لو مروحتش الطرد غالباً هيتوه ومش هيوصل لبيك ﻷنك البريد المصري خدمة التوصيل المجاني فيه سيئة جداً
الافضل تروح بنفسك
طب لو سمحت بالنسبة لموقع ادفعلي هل هو افضل خاصة لما اشتري من امازون ولا برده اشتري بنفسي من امازون
edfa3ly غالي جداً في تكاليف الشحن والجمارك
بس ميزته انو بيخلص اي الاجرائات الجمركية وكذلك كل التصاريح لو هتشتري حاجات زي الموبيلات والتابلت
طيب هل أنا محتاج أتعاقد مع شركة شحن زى DHL أو أرامكس
و لا الموقع نفسه بيظبط الحاجات دى و بيعتهالى على البيت على طول
الإجابة في المقال وبالتحديد في الجزء الخاص بالطرود وتتبع المشتريات
ازاى احسب قيمة الجمارك لاى منتج ؟
استشير الجمارك أو أي “مخلص جمركي” شغال معاهم
الي اعرفة أن الالكترونيات فقط عليها جمارك من 10 إلى 15%
وهل Ethernet Shield و xbee تحتاج تصاريح عند استلامها ؟
ايوه ليها تصاريح لأنها أدوات اتصال
لو عايز افتح تجاره من موضوع استيراد القطع بطريقه دى ازاى اثق ف كل مره يوصل الطلبيه بدون عائق
والمتجر اللى بيبقى ع موقع على اكسبريس بتبيع بالقطه ولا بالمجموعه مثلا 5 ليد بسعر كذا ولا هو بيقولك سعر الليد الواحد وانت بتختار الكميه ؟؟ وهل ممكن اشترى مجموعه قطع من كل صنف زى مثلا 10 مكثفات 10 بيكو ومقاومات بقيم مختلفه وليدات وهاكذا ويتجمع كله ف طرد ويتبعتلى ولا لازم اخد
عرض زى اللى ف موضوعك 2000 مقاومه مختلفه ؟؟
http://www.aliexpress.com/store/product/Free-shipping-10Pcs-lot-Wholesale-0-56-inch-1-Digit-7-Seven-Segment-Red-Light-LED/931011_1743335641.html
ممكن تفيدنى ازاى احدد عدد القطع زى السفن سجمنت مكتوب 10 pcs دى عدد القطع والسعر ده لعدد ده ولا سعر القطع
http://www.aliexpress.com/store/product/PICKIT3-PICKIT-3-Programmer-Offline-Programming-Simulation-PIC-Microcontroller-Chip-Monopoly-Free-Shipping-Dropshipping/931011_1420610280.html
ولينك زى مبرمجه بيك كيت 3 سعرها 28 دولار ده سعر القطعه فقط ؟
لو عايز تفتح تجارة لازم تستشير محامي لأن الطلبات الكبيرة والكميات بيبقى ليها رخصة استيراد خاصة
طيب معلش بالنسبة للمكونات الالكترونية واللى مفيهاش antenna
يعنى لو حبيت اشترى ICs او programmers بتاعتهم
اى دايرة او حاجة زى دى هل ده ممكن بسهولة ولا هيحتاج تصاريح !!
المفروض عادي ومالهاش جدا تصاريح
الكترونيات فقط
ولا ممكن كاميرات
الي جربته بنفسي هي المكونات الإلكترونية فقط وجربتها من موقعين مختلفين وأعتقد أن مفيش مشكلة الكاميرات بردة
شكرا جزيلا
طب لو سمحت يا بشمهندس هل حاجات الاسلكي هي بس الي بتحتاج تصاريح ولا في حاجات تانية غيرها سواء الالات اجهزة اي حاجة تانية
الي أعرفه أن الحاجات اللاسلكية أو أي حاجة بتعمل اتصالات من أي نوع
الاسعار مش رخيصة اوى كدة بالنسبة للسلع التانية زى الفلاشات والميمورى قريبة من اسعار مصر ودا غريب
لاحظ اني في بداية المقال كتبت أن الموضوع موجهة للناس الي عايزة تشتري مكونات الكترونية وليس التسوق بكل منتجاته بشكل عام
بالإضافة أن مواقع dx & aliexpress هي مواقع تجزئة مش جمله
جزاك الله خيرا
طيب انا لقيت سلعه معينه ف امازون ارخص من موقع aliexpress هل ممكن اشترى السلعه ديه من امازون نفس الخطوات و لا فى اختلافات و لو فى ممكن اعرفها و شكراا
مفيش فرق – نفس الخطوات بالظبط
كنت عندى استفسار بخصوص الــ master card
بشحنها ازاى بفلوس ؟؟؟
وكمان هل ممكن اسحب بيها الفلوس اللى فيها دى من اى ماكينه سحب ؟؟؟
معذره انا معنديش أى خلفيه بنكيه ^_^
بتروح البنك وتطلب شحن البطاقة – بس كدا 🙂
لاحظ ان بطاقة الماستر كارد في منها نوعين
الاول رخيص وسعرة 20 جنية (دا الي اتكلمت عنه في المقال) ودا مينفعش تسحب منه من ماكينات سحب الفلوس
وفي نوع تاني بيتعمل لما يكون ليك حساب في البنك وممكن تسحب منه اذا كان البنك مديلك حق السحب
بس دا لازم تعمل حساب بنكي كامل
السلام عليكم
شكرا جدا لحضرتك علي المجهود اللي بتعملة لافادة غيرك
انا اسف انا عارف ان الرد جاي يعد سنة تقريبا من الرد بتاع حضرتك بس دا لان انا لسة مشتري حاجة النهاردة من الصين و كنت حابب اشوف التعليقات علشان الملاحظات دي
انا ملاحظتي علي ان البطاقة اللي ب 20 جنية مش ينفع يتسحب منها من الماكينة
انا عامل بطاقة thomas cook اللي ب 30 جنية و ( اجرائات استخراج البطاقة فقط ) و من غير اي حساب بنكي بستخدمها عادي في سحب و ايداع الفلوس من الماكينات و يمكن الشراء بها من اي مكان كمان
ودة لينك البطاقة من البنك
http://www.cibeg.com/English/Personal/Cards/Pages/CIB-Thomas-Cook-Card–.aspx
وشكرا جدا لحضرتك
السلام عليكم
أحب الأول أشكر حضرتك على المقال المفيد جداااااااا ده
بعد ما قراته تشجعت و قمت بشراء أشياء كنت محتاجها من زمان 🙂
والشحنة الحمد الله وصلت امبارح رمسيس
بس انا كاتب العنوان على دمنهور
فكلمتهم النهاردة فى البريد قالولى انه بيقعد من أسبوع لى 10 أيام عشان أجراءات جمارك البريد !!!
عاوز أعرف حضرتك أما روحت تانى يوم من وصولها رمسيس أستلمتها فى نفس اليوم ولا أنتظرت المدة ديه عشان أجراءات جمارك البريد ؟؟؟
اجرائات الجمارك بتاخد من 5 الى 7 ايام بالفعل
ما هو ثمن الشحن للجزائر
يكون مكتوب في الموقع نفسة
كل بلد يكتب يختلف سعر الشحن الخاص بها
مع ملاحظة ان موقع dx.com ومعظم التجار في ALiexpress يقدمون خدمة الشحن المجاني لمعظم دول العالم
هل شراء بورده beaglebone black يحتاج إلي تراخيص ؟
انت حمستني جدا اني اجرب بس عندي سؤال منتج زي راسبيري باي
http://www.aliexpress.com/item/Raspberry-Pi-Project-Board-Model-B-Rev2-0-512-ARM-Free-Shipping-Dropshipping/1128908170.html
بيكون الجمارك عليه كام ؟؟؟ والمصاريف الادارية والقانونية؟؟؟
مجربتش اشتريها من برا مصر فمش هقدر افيدك مع اﻷسف
بس عام الجمارك على الالكترونيات من 8 الى 15%
بعد اذنك دلوقتى انا اخترت شويه مكونات مختلفه من كذا تاجر على موقع aliexpress ..فهل دلوقتى كل قطعه هتيجى لوحدها فى طرد ولا الباكدج هتيجى كلها مع بعض …اصلهم حوالى ١٠ قطع ف هيبقى صعب كل شويه اروح استلم واحد فيهم
بص يا ريس
لو اشتريت كل القطع من تاجر واحد كلهم هيجيو في بوكس واحد
اما لو تجار مختلفين كل قطعة هتيجي لوحدها مع اﻷسف في طرد مستقل
انا جربت اشتري 3 حاجات وال3 جم في طرود مختلفة تماماً
شكرا . جزاكم الله كل خير علي الموضوع .
لدي سؤال . هل الريسبري باي لديه مشكلة في دخول البلد ؟ يعني هحتاج تراخيص ولا لاء :]
النسخة A ممكن تدخل عادي
أما النسخة B ممكن تتحجز علشان فيها Ethernet (منفذ الشبكة) وساعات الجمارك بتعتبرة أداة اتصالات
معلش يا باشمهندس عندى استفسار تانى …دلوقتى انا عملت اوردر من على الموقع ودفعت من حوالى 4 ايام كده وادانى فى الستيتس ان البايع شحن الحاجه فعلا وادونى رقم للشحنه عشان التتبع بس كتبت الرقم ده لى كذا موقع زى بتاع البريد المصرى وموقع البريد الصينى بس بيطلعلى رساله (0 items found) فهل ده طبيعى عشان لسه الموضوع مبقالوش 4 ايام وهل يا ترى حصل معاك كده والحاجه هتبتدى تظهر بياناتها امتى …وجزاكم الله خيرا
الحاجة بتبدأ تظهر من اسبوع من تاريخ الشحن
معلش يا بشمهندس ….. انا كنت عايز اشترى من موقع الامازون Arduino due ومعايا Master Card فى خطوة العنوان بكتب عنوانى ومنطقتى ؟؟؟ والمقصود بعنوان ثابت للشحن عنوانى ؟؟؟؟
والجزء بتاع ZIP/Postal Code عبارة عن ايه ؟؟؟؟
وهل بعد وصول الشحنة بتوصل فى رمسيس وبعد كدا بتحول على عنوانى
وهل انا محتاج اتعاقد مع شركة شحن
بتكتب عنوان بيتك زي المكتوب في البطاقة بتاعتك
وبالنسبة لل ZIP Code دا بيبقى رقم أقرب مركز بريد من بيتك
دور على أقرب مركز منك وهتلاقي على اليافطة بتاعته كود من 5 اراقام زي 11678 – 11782 … الخ
ولما الحاجة هتوصل مصر هتجيلك على رمسيس اﻷول وتفضل هناك لمدة أسبوع
وبعد كدا مركز رمسيس الرئيسي بيوديها ﻷقرب مركز بريدي من بيتك (بس أنصحك تروح تستلمها من رمسيس علشان ما تدفعش ايجار تخزين وارسال ومصاريف حكومية اضافية)
طب فى حالة تعاقدى مع شركة شحن بكتب الرقم البريدى اللى انا اخدته منهم وبستلمها منهم ؟؟؟؟ وفى حالة عدم تعاقدى التاجر كدا عملية الشحن بتتم ازاى ؟؟؟؟؟؟؟
وهل فى حاجة تانية محتاجها غير Postal Code ورقم التليفون عشان اقوم باتمام الخطوات ؟؟؟؟؟
جزاك الله خيراااا يا بشمهندس ………
مجربتش الصراحة شركات شحن أخرى فمش هقدر أفيدك في النقطة دي
وانت غالباً مش هتحتاج غير رقم التليفون والعنوان وال postal code فقط
أهم حاجة العنوان ويكون زي المكتوب في البطاقة الشخصية بتاعتك
أولا اشكرك اخي الكريم على مقالك الجيد … ثانيا أحب أن أقول معلومة من واقع خبرتي في الشراء عشرات المرات من الصين لعل وعسى أن تفيد … للأسف الشديد جدا الجمارك في مصر غير مستقرة ويتم تقديرها بشكل الى حد كبير عشوائي دون قاعدة فعلى سبيل المثال طلبت شحنة تتكون من 50 PCB فارغة مجرد بورد فدفعت جمارك لها 300 جنيه .. وبعد عدة اشهر طلبت نفس الشحنة ونفس نوع الـ PCB ونفس الكمية ونفس شركة الشحن ونفس التاجر وكانت النتيجة دفع 530 جنيه جمارك ومصاريف ادارية. بدلا من 300 جنيه !!!
أنصح لمن يخاف من الجمارك أن يستخدم الشحن بالبريد المصري أو free shipping فغالبا وليس دائما .. غالبا يكون تقدير موظف الجمارك لهذه الشحنات مبلغ أقل من الذي يقدره للشحنات التي تأتي بالشحن السريع مثل DHL أو FedEx .
نقطة أخرى مهمة .. الكميات والاوزان الكبيرة تقف في الجمارك وتحتاج إلى تصاريح كثيرة مثل السجل التجاري وبطاقة استيرادية وخلافه لذا لمحبي الالكترونيات أنصح عدم شراء شيء يتجاوز 2 كجم .. وإذا كنت مضطر إلى ذلك قم بتقسيمهم إلى عدة شحنات منفصلة كل شحنة تصل في وقت وإلا قد تقف شحنتك في الجمارك شهور ولا تستطيع تخليصها إلا بالكثير من الرشاوي والكثير من الجهد والتعب وقد تخسرها ولا تستطيع ادخالها إلى مصر
للاسف الفساد في مصر بلا حدود ..
أنصح من يتعامل بالكميات الكبيرة التعامل مع شركات التخليص الجمركي (شرط أن تكون شركة أمينة وجيدة) لتحصل على أقل جمارك ومصاريف
تحياتي إليك أخي الحبيب .. وشكرا جزيلا لك
شكراً جزيلاً استاذنا العزيز م.أحمد على نصائحك
وبالفعل تعرضت لنفس الموقف تماما كما حدث معك حيث اشتريت مجموعة من المكونات بنحو 8 دولار (ولكن على4 مرات مختلفة)
وفي كل مرة أدفع جمارك مختلفة تماماً (مرة 25 جنية ومرة 40 ومرة مجاناً بدون مصاريف ومرة أخرى 80 جنية) !!
بالفعل الوضع عشوائي ويخضغ (لمزاج) المخلص الجمركي بسبب موضوع (التقدير الجمركي للمحصل) وغالباً المحصل بيقيم الرقم على مزاجة وليس تبعاً للفاتورة
شكراً مجدداً على نصائحك استاذنا الكريم : )
اولا : اشكر المهندس / Abdallah Ali على هذه المعلومات القيمة والمفيدة
ثانيا : أشكر المهندس / أحمد سمير فايد والله يافندم سعدت بمشاركة حضرتك وفرحت كأنى شوفتك وفرصه اشكر حضرنك على مشاريعك ومحاضراتك وفيديوهاتك التى لاتقدر بثمن والتى اشعر دائما من كلماتك بمدى عمق علاقتك بالله سبحانه وتعالى وأقل شىء ممكن أقدمه لحضرتك أنى أدعو الله دائما لك بظهر الغيب على علمك النافع وربنا يتقيل
معلش يا باشمهندس ..هو انت مجتش فتره كده ومبقاش ييجى اى بيانات جديده عن الطرد ..يعنى اخر ستيتس كانت بتاريخ ٣٠ نوفمبر وبقاله اسبوع مثلا مبيظهرش اى ستيتس جديده واخر مره كان فى بكين والمفروض انه اتشحن ..فهل هحصل معاك حاجه زى كده ؟ ولكم جزيل الشكر
تابع الطرد على موقع البريد المصري
لان ساعات المواقع الصيني مش بتجيب مكان الطرود اذا وصلت للبلد المرسل اليه
السلام عليكم ورحمة الله وبركاته
أولا جزاك الله خيرا على مجهودك الأكثر من رائع سواء في الكتب أو الموضوعات
ثانيا كان لي سؤال بخصوص شراء Raspberry Pi B+ module
هل المنتجات الموجودة على الموقع انتاج UK ام انها انتاج الصين ؟
لاحظت أن السعر على الموقع مرتفع عن السعر الطبيعي المعلن من مؤسسة Raspberry Pi
هل توجد أماكن أخرى للشراء بالسعر المعلن 35$ ويكون منتج أصلي ؟
وشكرا
جميع المننتجات على Aliexpress من الصين فقط
واذا أردت شراء النسخة UK للراسبيري باي فعليك بشرائها من Amazon او Ebay أو اي متجر انجليزي في انجلترا نفسها
غالبا لن تستطيع شراء الراسبيري بنفس السعر فحتى المتاجر اﻷمريكية تبيعها بنحو 38 او 39 دولار
هي بطاقة ” ماستر كارد مسبقة الدفع” عبر الإنترنت للشباب اللي في البنك الاهلي المصري
بتطلع بعد اد ايه ؟ وهل في بطاقات تانية في بنوك غير الاهلي المصري وقطر الوطني بتطلع في وقت قصير ومضمونة ؟
بطاقة البنك اﻷهلي بتطلع بعد اسبوعين تقريباً وتكاليفها 20 جنية لكل سنيتن
وفي بنك CIB بتطلع في نفس اليوم وتكاليفها 50 جنية لكل سنة تقريباً
ما رأى حضرتك فى استيراد قطعة راسبيرى باى أو بنانا باى
جرب استيرادها – عموماً لا أعتقد ان في مشكلة من استيرادها
اذا نجحت في التجربة أتمنى أن تخبرني حتى يعلم الجميع 🙂
بمساعدة موضوعكم قمت بطلب شحنة من الصين بتكلفة 62 $ ووصلت خلال 15 يوم فقط والجمرك لم يتعدى 30 جنيهاً , بسبب أنه كتبلي فاتورة منخفضة , والخدمة كانت ممتازة وعلى نية بتكرار العملية ,, شكراً لكم
رائع جداً. . انا سعيد بنجاح تجربتكم 🙂
لو سسمحت هل فى مشكله فى استيراد الكوادكوبتر ؟؟؟
لو انت في مصر اعتقد في مشاكل في الوقت الحالي – بلاش تستوردها أحسن وحاول تشتري واحدة من هنا
هتلاقيها اما في مصل فيوتشر او محلات الالعاب الكبيرة
السلام عليكم
اولا شكرا جدا علي الموضوع دا انا فعلا ناوي اطلب arduino mini و servo+altrasonic كمان بس من Ebay مش من Aliexpress و شحن مجانا لمصر
دا المفروض ان شاء الله استلمهم من مكتب بريد رمسيس صح !؟
و هل في مشكله لو الشحنه خرجت من غير Tracking number ?! عشان البايع بيشترط 2 دولار علي ال tracking number
انا طالب حجات تقريبا ب 10$
و شكرا 🙂
وعليكم السلام ورحمة الله وبركاته
لازم الحاجة تيجي ب track number علشان تعرف مكانها فين وهتستلمها امتى
وممكن تستلمها من رمسيس او تنتظر فترة أطول لحد لما تروح أقرب مكتب بريد لبيتك
وبالمناسبة لو اشتريتها من الصين غالبا هتلاقي سعر الحاجات دي أرخص ومعاها tracking number مجاني
شكرا جدا جزاك الله خير يا باشمهندس 🙂
طيب لو انا عايز اعرف ايه الحاجات اللى ينفع استوردها وايه لا اكلم مين (يعنى رقم جهه معينه استفسر منها ) ؟!
الحقيقة انا معرفش جهة معينة ممكن تسألها (احنا في مصر فدا العادي 🙂 ) بس في قائمة الـ Unaccepted Materials في Aramex Shop and ship اللي ما تدخلش مصر – أعتقد ان اي حاجة تانية مسموح تدخل ودا لينك للقائمة
https://www.shopandship.com/content/uploads/110/282/47628/SNS-Unacceptable-EN.pdf
رقم التتبع للطرد بيظهر اول ما اعمل الاوردر ولا بعد كدة
بعد ما تدفع الفلوس بالفيزا هيظهر بعدها ب 5 ايام “لما التاجر يبدأ يشحن البضاعة”
طب سؤال سخيف كده
انا العنوان هكتبه بالانجليزي طبعا !
ممكن يكون في لخبطة عندهم او في مصر قي الموضوع ده ؟؟؟
اكتب انجليزي عادي جدا ومخافش من موضوع اللخبطة لان كدا كدا الي بيوصل الحاجة البريد المصري
اكتب انجليزي عادي جدا
متخافش من موضوع اللخبطة لان كدا كدا الي بيوصل الحاجة البريد المصري
شكرا 🙂
حضرتك بتقول ان كل المنتجات اللي عاي aliexpress صيني ؟
بس انا شفت rasspberry pi مكتوب عليه made in UK ده حقيقي بقي ولا ؟
منتجات علي اكسبربيس – صيني فقط
او سمحت, انا شحنتى وصلت النهاردة لرمسيس.
ينفع اروح اجيبها بكرة منه ؟
لا – الافضل تنتظر 4 ايام علشان اجرائات الجمارك تكون خلصت
@ahmed alaa
انا اشتريت المنتج ده
http://www.aliexpress.com/item/free-shipping-raspberry-pie-2-Raspberry-pi-2-generation-B-512M-memory-green-plate-imported-UK/1550832366.html
والمنتج ده
http://www.aliexpress.com/item/free-shipping-RASPBERRY-PI-RPI-CAMERA-5-000-000-pixels-Raspberry-pi-dedicated/1198946325.html
التاجر عارض نسختين من الكاميرا فرق السعر بينهم حوالي 6$ ولما سألته على الفرق بين الاتنين قالي
one is made in china
one is made in UK
ومن تعليقات الناس على Raspberry Pi B+ model , واضح انها نسخة element14 أصلية
فيه تاجر تاني بيعرض نسخة RS أصلية أيضاً
http://www.aliexpress.com/item/-/2008093537.html
الشحنة بتاعتي وصلت مصر النهاردة, لكن لسه موصلتش رمسيس, ان شاء الله لما استلمها اكتب تعليق عن جودة المنتج
ممكن تلاقي تجار من الصين بيستوردوها من انجلترا ويعيدو بيعها فعلا
يا ريت تقولنا على النتيجة لما تستلم الحاجة باذن الله
بالتوفيق 🙂
بعد اذنك. انا استلمت طردين النهارده,
وده اللى تم معايا اشتريت استمارة جمارك ب7 جنية وبعد كده دفعونى فلوس الجمارك, وفى الاخر دفعونى 13.5جنية لكل طرد (10 مصاريف + 3.5 اخطار وصول ) بس ان لاحظت بعد ما استلمت ان فى طرد مكتوب عليه القيمة الاجمالية 1$ وهو 1.8$ وفى طرد مش مكتوب عليه فى ناحية والناحية التانية مكتوب 0.47$ فى حين قيمته الفعلية 5.8$ وانا مقولتش للمصدرين انهم يغيروا فى القيمه, فهما هناك مصدقونيش لما قولت سعره وقيموه على مزاجهم وكلفونى كتير. اقدر اعمل حاجة مع المصانع على علىٍ بابا !!
ممكن وانت بتشتري تبعت رسالة للتجار يكتبلك السعر الي انت عايزة علشان ما تحصلش المشكلة دي تاني
لو سمحت انا لو هجيب كيت تقريبا حوالي ب450 جنيه هدفع عليها أد ايه جمارك وصحيح لو خليل التاجر يقلل السعر هقلل جماركها مهما كانت؟؟
الجمارك على اﻹلكترونيات عادة من 10 الى 15% وفي 15 جنية مصاريف ادارية ثابتة
بس عموما الرقم النهائي بيخضع لتقدير المحصل الجمركي فممكن يبقى زيادة او اقل (انت وحظك) بس ش هيزيد عن 15% غالبا
شكرا جداً على هذا الموضوع الرائع 🙂
كان عندى استفسار: انا ساكن بعيد عن العنوان الأصلى اللى متسجل على البطاقة
وانا عندى صندوق بريد فى مكتب البريد اللى جنب بيتى فهل أستطيع استخدامه ؟
نعم يمكنك استخدام عنوان صندوق البريد
السلام عليكم انا عايز اشترى اكتر من غرض الكترونى حوالى عشر اوردرات من اكثر من تاجر هل فى طريقة يكونة فى طرد واحد ولا كل طرد هيوصل لوحدة وبالنسبة لو فى اكثر من اوردر من تاجر واحد ممكن اطلب منة تكون شحنة واحدة
كل حاجة هتوصل لوحدها مع اﻷسف ومينفعش تجمع الحاجات الا الي بتيجي من تاجر واحد
Pingback: استيراد اﻹلكترونيات من الصين الجزء الثاني – استخراج تصاريح أجهزة اﻹتصالات وأشياء أخرى - آردوينو ببساطة
بالنسبة للجمارك و مصاريف الشحن,دلوقتى أنت قلت إن الموقعين بيشحنوا ببلاش يعنى كل اللى بيتدفع فى النهاية بيكون مصاريف الجمارك,دى بتكون تقديرها على أساس إيه؟ ال15% دول بس؟حبيت أتأكد بس , و بالنسبة للشحن بيكون متاح ليا إنى أختار اثناء الشراء اى شركة شحن او عبر البريد؟
و أخيرا شكرا على مجهودك ,فعبا من المدونات الإلكترونية العربية اللى بحترمها و بقترحها دائما للمهتمين 🙂
الجمارك على الالكترونيات في مصر من 10 الى 15% وبتخضع لتقييم محاسب الجمارك الي هيستلم الطرد ويقيم الجمارك عليه
يعني القيمة مش ثابتة وانما تقديرياً هي من 10 الى 15% + في مصاريف ادارية حوالي 11 او 12 جنية كمان على اي طرد هيوصل ليك
لو سمحت هل الرسبرباى اخر اصدار مسموح بدخولها؟
الاصدار A مسموح – اما B قد يتطلب تصريح
لو الجمارك علي الطرد طلعت رقم عالي و انا مستلمتش الطرد فلوسي حترجعلي ولا راحت عليا + حترجع امتي ؟؟؟
ممكن تكلم التاجر وتقوله انك هترجعله الحاجات وفلوسك هترجعلك باذن الله
انا شخصيا مجربتش قبل كدا بس كنت قرأت عن ناس جربو يرجعو الحاجة وبالفعل استلمو فلوسهم تاني بعد ما البضاعة رجعت للتاجر الصين (الموضوع خد شهرين تقريباً)
بعد أذنك يا باشمهندس , انا كنت طلبت حاجات وعلي موقع التتبع لقيته كاتب كده
nsert item into domestic bag
مع العلم اني من الاسكندريه مش القاهره, هل ده معناه انه هيتم شحنه لبريد الاسكندريه ام انه هيرجع الصين تاني
وجزاك الله خيرا
معناه ان اجرائات الجمارك في رمسيس خلصت وهيتم شحنة الى اسكندرية لتسليمة اليك
طب سؤال تاني معلش,
انا من اسكندريه لو طلبت حاجه محتاجه تصريح, هضطر اسافر بنفسي للقاهره اعمل تصريح ولا هما بيعملو الكلام ده ؟ ولو هم مش بيعملو كده, هل من الممكن أخلي صديق ليا يروح ولا لازم اروح بنفسي؟
شكرا
غالبا هيطلبو منك تبعت صورة البطافة فقط على حسب الي حصل مع اصدقاء ليا
شكرا جزيلا وجزاك الله خيرا
Pingback: ?……..Where can you buy —–اماكن البيع | Arduhany
جزاك الله خيرا يا بشمهندس ع مجهودك الرائع
كنا شغالين ف مشروع تبع تيك .. ومحتاجين نصنع راسبيرى باى B + مودم gprs&3g
ويجوا كلهم مع بعض ف بورد واحده ..
فهل موقع على اكبريس فيه تجار للتصنيع والارسال مع بعض .. ولا لازم اسافر الصين
ولو حضرتك تنصحنى بموقع او مصنع معين ..يصنعلى الجهاز ه بجودة عاليه وسعر مناسب ..يبقى جزاك الله كل خير
انا كلمت حضرتك قبل كده ..
م. حسين
شكرا
شركة SeedStudio بتقدم خدمة تصميم ال PCBs لحد 4 layers
بتبعت ليها أي ديزاين جاهز وهيعملو منه من 3 اول نسخ او اكثر (اسعارهم رخيصة نوعا ما وجودتها عالية جداً)
دا الموقع الي تقدر تعمل منه ال PCBوبيحسبلك التكلفة https://www.seeedstudio.com/service/index.php?r=pcb
ممكن تاخد تصميم مفتوح المصدر لبوردات مشابهه للراسبيري وتدمج معاها ال SIM900 بنفسك زي بوردات OlinuXino
https://www.olimex.com/Products/OLinuXino/open-source-hardware
في تصميمات ل SIM900 كتير مخصصة لبوردات لينكس زي الراسبيري باي وأمثالها – دور على GSM sheild for raspberry pi ممكن تدمجه مع تصميم OlinuXino
شكرا جزيلا ع الرد
بس الراسبيرى باى 7 layer .. مش هيقدر يصنعاه المصنع ده ..ولا ايه ؟؟
وهل ال GSM sheild for RPI بيشتغل زى المودم بتاع فودافون او موبنيل بالظبط ..وهيستحمل شغل 24 ساعه ؟؟
اصل احنا اشتغلنا ع sim900 قبل كده ومنفعش معانا ع الراسبيرى تعبنا جداااااااااااا
لكن المودم ريحتنا اوى
وشكرا
بالنسبة لل 7 طبقات مع الاسف المصنع بيصنع لحد 4 طبقات فقط – بس دي مش مشكلة، لو دخلت على رابط البوردات المذكورة سابقا هتلاقيها 2 طبقة فقط ومصممة خصيصا علشان الناس تعرف تصنعها بنفسها بسهولة (وفي حاجات كمان قدراتها ضعف الراسبيري باي العادية). وطالما كدا كدا هتشتغلو Embedded linux مش شرط تستخدم الراسبيري باي اصلا ويكفي اي تصميم مختلف طالما هيشغل لينكس
الـ SIM 900 مجرد مثال فقط، في شرائح GSM كتيرة تانية بس انا قولت عليه لانو اشهر الشرائح واكثرها توافرا سواء في السوق المحلية او الدولية
عامة أغلب الشرائح المصممة لتطبيقات ال Embedded زي SIM900 هتستحمل شغل 24 ساعة من غير مشكلة باذن الله وعن تجارب اشخاص كتير
يعنى ف بورد اعلى من الراسبيرى وينزل عليها debian عادى جدا زى الراسبيىرى .. واضيفلها المودم ع طول .. تمام جدا
طب المصنع نفسه لو قولتله عليهم من غير مختار تصميم .. وقولتله ع المواصفات اللى محتاجاه .. يقدر يوفرها ع طول
ولا لازم ابعتله تصميم ؟؟
وشكرا .. جزاك الله كل خير
طبعاً في بوردات كتير أعلى من الراسبيري باي بمراحل
وبالنسبة للمصنع على حد علمي seeedstuido معندهمش خدمة تصميم – هما بينفذو فقط
والمصانع بتاعت الصين لو هتصمم ليك حاجة مخصوص لازم تطلب منها اﻵلاف القطع
ممكن تدور على موقع freelancer هتلاقيه عليه مصممي PCB كتير جداً ممكن ينفذو ليك الفكرة بتكلفة من 600 الى 1200 دولار
لو روحت لشركة تصميم غالباً هتوصل ل 6 او 8 الاف دولار على الاقل
600 ل 1000 دولار ع التصميم فقط مظبوط ؟ ..وهنصمم مره وحده بس .. بس التصميم يكون شغال 100 % بالمواصفات المظبوطه وناخد التصميم نصنع بيه بقا بسعر ارخص بكتير ف شركة seeedstuido .. وده لسبب اننا معندناش الخبرة الكافية ف الالكترونيكس لتصميم كمبيوتر او مودم .. حتى لو جربنا حجات من النت .. مش هتبقى مضمونه وعايزه خبرة وتكرار عالى .. وده هياخد وقت وجهد كبيييييير جدا بالنسبالنا
لكن نشترى التصميم اللى بالمواصفات المطلوبه .. وبعد كده نصنع زى محنا عايزين طالما معانا التصميم
هنحاول ندور ع مصم كويس او شركة تصميم كويسه .. ولو جه قدام حضرتك مصمم كويس او شكرة كويسه ..يبقى جزاك الله خيرا ع تعبك معانا
وشكرا جزيلا 🙂
السلام عليكم منت افكر اشتري arduino starter kit يا تري في مشاكل في دخولها من الجمارك
http://www.ebay.com/itm/UNO-R3-Starter-Kit-for-Arduino-1602LCD-Servo-Ultrasonic-Motor-LED-Relay-RTC-/161692407245?hash=item25a59e55cd
طالما مفهاش حاجة وايرلس مفيش مشكلة
مع العلم انك ممكن تشتريها محليا من ال online stores باسعار مشابهه للسعر دا
واعتذر عن التأخير في الرد لاني مش فترة مفتحتش التعليقات 🙂
هو ال Bluetooth module داخل تبع المنتجات اللاسلكيه ، يعنى هيحتاج لترخيص ؟؟
ايوة داخل ضمن الحاجات المحتاجة تصريح
بجد انا مش مصدق ان في حد عربي عامل موقع خدمي بالمجهود دا في المجال دا ، الموقع وفر عليا بحث و تجربة كتير جدا ربنا يكرمك و ياريت تستمر
على الرحب والسعة 🙂
المهم ان الناس تستفاد بالعلم وتعمل حاجة مفيدة 🙂
بعد اذنك عايز استفسر عن شراء قطع واجزاء ماكينات ال cnc و صمامات الليزر وجهاز الشيلر المستخدم فى التبريد
هل ده ليه موافقات امنية مع العلم ان المكونات دى كلها صناعية ولا علاقة لها بالامن بس نقول ايه موظفين الجمارك مبيبقوش فاهمين ده ايه اساسا وياريت لو حد ليه تجارب فى حاجات زى كدة يقول
يفترض ان المواتير والحاجات والمتعلقة بالـ CNC مفهاش مشاكل وأعرف ناس اشتروها ودخلت عادي جداً
لكن الليزر مش عارف الحقيقة
السلام عليكم وجزاك الله خيرا على هذا المجهود الكبير
انا اول مرة اشترى مكونات الكترونية من aliexpress من ٩ ايام ولحد دلوقتى مديلى رقم تتبع 1077318876 وليس بالصيغة المكتوبة فى الشرح وكل ما اعمل تتبع من البريد المصرى يقول لا يوجد نتائج وتتبع فى mty tracking بيقول Your parcel arrives in destination country, please wait for dispatch in your local post office
فا انا مش عارف ليه اتتبعه على البريد المصرى وهل الطرد وصل فعلا رمسيس ولا لا؟
وشكرا 🙂
رقم التتبع لازم يبقى فيه CN او HK
عامة ممكن تبعت رسالة للتاجر (من نفس صفحة اﻷوردر) وتخلية يبعتلك الرقم تاني
حضرتك انا معيش غير العمله المصريه وموقع اكسبرس بيتعامل بعملات اجنبيه
جميع بطاقات الدفع الالكترونية بتحول العملة المحلية الى دولار مباشرة بدون أي تدخل منك
عاوز استورد EK-TM4C1294XL لمصر بغرض المتاجرة , تنصحنى اشترى من الصين ولا من موقع اوربى زى mouser
البوردة دى فيها ethernet . تفتكر من السهل استخرجلها تصاريخ من ntra ولا هيرخموا ؟
الأفضل تستودرها من مصدر أوربي أو أمريكي زي Digikey أو Mouser
أعتقد ان مفيش مشكلة من ناحية NTRA – المشاكل عادة بتكون متعلقة بالـ Wirless modules فقط
شركة ألتيست شركة عربية متخصصة في بيع القطع واللوازم الالكترونية من الصين
نقدم خدمات ممتازة ونضمن ما نبيع
http://www.ultest.com
و سمحت انا من السويس لو اشتريت حاجه من علي اكسبريس اول حاجه هتروح علي البريد الي في رمسيس بعد كده تجيلي في مكتب بريد في السويس ولا ايه ؟
بالضبط – اﻷول بريد رمسيس بعد كدا البريد المحلي
السلام عليكم بالنسبة لل HC-05 Bluetooth Model هل لازم تصريح؟ و حاجة تاني الجمارك و الضرائب نسبتها اد ايه اليومين دول ؟ وشكرا
اي موديول لاسلكي لازم تصريح لاستخراجة من الجمارك
عادة الجمارك من 15 غلى 25% على الالكترونيات
لو سمحت انا اشتريت درايفر لموتور من على على اكسبريس من حوالى شهر و نص كده و خدت 03524946980 tracking number و كل حاجه بس بقاله شهر مكتوبلى لما اعمله ” track ” Guangzhou Transit Station export security scan
زائد انى لما كلمت خدمة العملاء قالولى مفيش رقم تتبع كده و لازم يبقى فيه حروف فى الاول و فى الاخر ، و الا ممكن يكون هيتشحن لجهه تانيه غير البريد ، اعرف الكلام ده ازاى؟ ولا اكبر دماغى و اعمل open dispute?
اخي العزيز انا عندي مذر بورد باسم hep001 لجهاز بيانو kawai KSP10 هل بامكاني ان اجده في المواقع الصينيه الي ذكرتها ارجو الافاده مع خالص الشكر والتقدير
“سلام عليكم شباب
والله عندي تجربة احسن من الصين. في شركة توزيع بولندية واسعارهم الحمدالله رخيصه وعندهم ماركات عالميه
تجربتي معاهم والله كانت طيبه وخدمة توصيل ب 15 دولار بال دي اتش ال
http://www.tme.eu
تحياتي
آدم المنامه”
السلام عليكم
ممكن اعرف هو فى مشكله فى استيراد ال solder mask فى بعض الاشخاص بيقولو انه بيتفحص لانه من ضمن المواد الكميائيه ورسوم الفحص 400جنيه ده غير الجمارك هل الكلام دة صحيح ارجو الافاده
صديق ليا حصل معاه الكلام دا بالفعل وتم اعتبارة مادة كيميائة تتطلب الفحص
لكن معنديش فكرة عن تكلفة الفحص
فى شركات فى مصر بتصنع الدوائر الالكترونية زى http://www.pyramidg.com
هل لازالت القوانين والمعاملة نفسها حاليا في 2021 ولا في تغييرات، علشان بحس انهم بيرخموا اليومين دول، كنت طالب شوية حجات ملهاش اي لزمة عدة شغل زي Tweezers وحجات تاني متوفرة في السوق المصري بس غالية طلبوا مني اروح قرية البضائغ في المطار استبعدت المشوار وخليت الحاجة ترجع وعملت refund ودي كان تجربة سيئة مكررتهاش تاني.